政情：港府招安白鴿遏反對聲

鬧得最狠 鄭汝樺出手

立法規管一手住宅物業銷售督導委員會尋日正式開鑼，會後向記者匯報委員會未來工作路線圖同時間表嘅，唔係任主席嘅運輸及房屋局常秘柏志高，而係民主黨立法會議員「高達」李永達。唔通世界變，民主黨變身執政黨？梗係唔係啦！係執政嘅特區政府想以收編高達令反對聲音「滅聲」就真。

一手樓銷售手法近年成為最為人詬病嘅問題，運輸及房屋局局長鄭汝樺日前委任高達入一手樓督導委員會，當時已經有人指政府又玩政治收編，一嚟塑造吸納異見嘅良好形象，二嚟多個自己友，等如少個敵人。高達過往喺一手樓問題上鬧得最狠，鄭汝樺出手收編，變相封咗高達半個口，反對聲音即時少咗好多。最現成嘅例子，高達尋日向記者講解委員會日後職權同工作進程，做得發言人嚟，仲邊有時間同閒情向委員會挑骨頭同埋發炮批評呢？

角色大兜轉 滅聲慣技

其實，政府收編政治對手，近年已經成為建制派殲滅反對聲音嘅慣技，好似雞○八年底獲旅發局委任做成員，上年再被西九文化區管理局招手，就係要收編雞，自此之後，雞經常以西九文化區管理局董事局成員身份出嚟講嘢，身份角色大兜轉，由以前嘅「反對派」，變為管理局代言人。

近期政府要同商界成立被譏為「商界贖罪券」嘅一百億元關愛基金，被外界猛烈抨擊，於是政府就委任曾經公開要求基金收檔嘅社福學者周永新同民主黨羅致光做成員，真正用意如何，畫公仔唔使畫出腸啦。

我哋尋日問高達，佢話唔覺得被收編，仲話當局搵佢入一手樓督導委員會，全因佢過往喺一手樓銷售手法問題鬧得夠勁喎。佢話自己尋日喺會上已表明心志，政府做得啱就支持，唔啱就反對，無情講喎。大家又睇吓日後嘅發展！