中環出更：浸大超級派對王國強李肇星人氣勁
尋日超過一百位政商名人逼爆浸會大學，事關浸大搞咗個超級派對，同時舉行畢業禮、校長就職同榮譽博士頒授儀式，前來撐場嘅嘉賓多到數唔晒，令到寧靜嘅校園變得好熱鬧，盛況空前。按出席嘉賓捧場嘅對象計數，浸大校長陳新滋、獲頒榮譽博士學位嘅全國政協兼廣東社團總會主席王國強（KK）及前外交部長李肇星，成為全場人氣指數最高嘅「人氣王」。
尋日出席嘅嘉賓有外交部駐香港特派員呂新華、恒生銀行女大班梁高美懿、霍英東集團董事霍震宇、長實執董趙國雄、長江製衣創辦人陳瑞球同姪仔全國政協常委陳永棋、保安局政治助理盧奕基、協成行集團副董事總經理方文雄等。教育界方面有中大校長沈祖堯、科大校長陳繁昌、教育學院校長張炳良同珠海學院校長張忠柟等。
慶祝陳新滋就職
點解咁多校長喺度？原來浸大為慶祝陳新滋就職，今日將舉行「大學校長論壇——全球化時代的通識教育」，來自中、港、台、歐美和亞洲逾五十所大學嘅校長、副校長都嚟參加，為數多達一百幾人，所以尋日出現咗咁墟冚嘅場面。
政商網絡廣闊嘅KK可謂人氣爆燈，排住隊同佢影相祝賀嘅城中名人，數極都數唔晒，除咗前面提到嘅一眾政商名人之外，仲有理文造紙老闆李運強夫婦同囝囝、名媛恒興業集團董事趙曾學韞、前保良局主席劉陳小寶、仁愛堂前主席史立德等。最難得係KK全家三代扶老攜幼齊現身，加埋大仔新抱嘅BB年底出世，將升格做爺爺嘅KK真係威到盡。
好多人就一石多鳥，一次過撐好多人。好似「樓神」趙國雄同球伯咁，都係撐三大人氣王。棋哥就撐埋獲頒文學博士嘅著名雕塑家文樓。幽默機智嘅李肇星，雖然冇太多親友嚟見證開心時刻，但呂新華全程陪同，而且李肇星隨後喺浸大有場講述外交生活點滴嘅演講，好多名人、同學慕名而來，逼到會場水洩不通，受歡迎程度直逼大明星。
卓妮