政府計劃申辦二○二三年亞運成為一場鬧劇，「好打得」嘅發展局局長林鄭月娥尋日「忽然體育」搶功，接受電台訪問主動提起，話前日見到場地單車運動員李慧詩喺亞運奪金，令佢非常非常興奮，因為四年前多哈亞運時佢身為民政局常秘，見證單車隊攞到好成績，之後促使政府決定興建首個國際級室內單車場，畀運動員一定鼓舞。
林鄭仲話，當年啟示到香港運動員嘅水平其實相當卓越，但需要支持先可以將表現推到頂點，又大讚單車隊教練沈金康為賽事投入全部精力兼愛護運動員，運動界每一名成員都值得支持及尊重，而要支持，投資係不二之門。
民政事務局局長曾德成諮詢公眾對申亞嘅意見，一時玩自閉唔見人，唔出席立法會嘅公開會議，一時又亂拋書包，講話甚麼「一刻值千金」，一時又亂咁減價，仲話有根有據。依家又有林鄭挺身而出好興奮咁講香港運動員奪金，好似想做埋人哋份工咁。香港政府有班咁嘅局長，都算騎呢咯。