政情：阿石幫陳裕光講好話
大家樂主席兼臨時最低工資委員會成員陳裕光剋扣員工飯鐘錢一事引起全城激憤，各界怒轟佢走法律罅，最後喺群眾壓力下，不得不收番扣飯鐘錢嘅刻薄決定。當人人都話港府唔應該再委任陳裕光入最低工資委員會之際，喺同一委員會嘅職工盟創會主席劉千石尋日就幫佢講盡好說話，指陳裕光就算入番委員會都唔係大問題。
阿石話臨資會成員合作咗咁耐，已經過咗最艱難嘅磨合期，正所謂「做生不如做熟」，如果成個班底過渡就最好。阿石仲好支持陳裕光繼續做委員，因為佢最後都收番扣飯鐘錢嘅做法，算係知錯能改，應該畀佢繼續做喎。
其實當初有兩個商界代表企硬唔接受廿八蚊，最後係陳裕光首先軟化，造就首個最低工資水平，都算係一個「有得傾」嘅人選，難怪阿石咁為佢講好話。
反而阿石自己就仲未決定係咪入番委員會，因為佢哋成日都要開十幾個鐘嘅馬拉松會議，對健康構成好大負擔，但佢好希望可以為勞工做多啲事，所以到依家仲心大心細！