中環出更：IT豪試完電動車想買番部
立法會資訊科技界議員IT豪譚偉豪（Samson）早幾日應邀參加香港電動車巡遊，Samson當日仲試揸咗一部由底特律電動車控股出品嘅蓮花跑車，由天水圍濕地公園駛到去香港科學園，Samson事後大呼過癮，仲話密謀買番部添。
Samson話，當日底特律電動車控股嘅行政總裁林秀山親自陪佢試揸呢部跑車，開頭佢都擔心電動車唔夠力，點知揸落原來唔係咁，除咗個車頭好順之餘，另一個優點就係非常寧靜，靜到連Samson都話唔覺自己揸緊跑車。
當日佢哋原本跟住大隊行，點知唔覺意行錯路，只好沿住吐露港公路駛返科學園。Samson話，吐露港公路限速比較高，令佢可以試到部車嘅性能，佢試揸完之後心郁郁，打算明年三月部車喺香港推出時買番部添。
電動車要搵地方充電，Samson建議立法會新大樓嘅停車場整番幾部充電器，除咗可以鼓勵議員用電動車外，亦可起示範作用，真係一舉兩得。話時話，部車到底幾多錢？大概八萬蚊美金，即六十幾萬港元，香港仲有免稅優惠添，幾大要買番部啦！
卓妮