中環出更：哥頓話樓市未泡沫但要小心
美國第二輪量化寬鬆措施（QE2）出台，唔少政商領袖都叫巿民小心。尋日卓妮喺馬場見到亞洲金融集團董事長陳有慶同政壇富婆張永珍，講到QE2，陳生話佢向來有買泰銖嚟分散投資，至於張永珍就話見到QE2出台之後，上海好多巿民買金，不過佢自己就無投資大計，就算佢以天價買古董都只係作私人珍藏，唔係想要破拍賣紀錄喎。
佢哋兩個都異口同聲話，覺得依家香港樓價好貴，所以都唔會入樓巿，陳有慶仲好支持政府喺無通報之下打擊樓巿添。至於不時都有人認為佢大仔陳智思應該選特首，陳生就代子澄清話唔會，問佢係咪嫌份工吃力不討好，佢就話︰「佢依家已經係啦﹗」皆因陳智思依家都已經係公職王。
施榮忻婚禮有拖冇欠
合和實業主席胡應湘（哥頓）謙稱自己唔識睇股票，但唔擔心QE2影響，因為佢相信美國政府唔會破產。至於佢熟悉嘅樓巿，佢就覺得仲未見泡沫，但當然巿民都要小心啲。之但係樓價無話無止境咁上升，所以佢相信如果供應多番啲，樓價就會比較平穩，至於土地供應夠唔夠，佢就話可以再多啲。
大家信唔信哥頓就要自己衡量，不過哥頓眼光確不能睇小，事關尋日胡太有馬出，哥頓同仔仔胡文新入場以示支持，但頭馬心水佢就另有別選，胡太臨開跑前特登補飛買埋另外兩隻支持老公眼光，結果另外兩隻馬包辦頭二名，帶挈胡太贏咗四百四十蚊，哥頓夫婦對對方咁信任，贏錢都贏得特別Sweet。
同場又見到施榮忻同女友，未來施太榮升媽咪三個月，已經火速修身，佢話囡囡好鍾意笑，個樣似足爸爸施榮忻，問佢哋幾時補辦婚禮，佢就話老公好忙，睇嚟一啲都唔介意喎，認真夠體貼。
卓妮