政情：社民連想拉周澄入黨
公社兩黨半年前因五區補選同「大專二○一二」嘅同學仔合作無間，其中藉此成功彈出、被封為新一代民主女神嘅周澄，更被指同社民連嘅行委私交甚篤。早前辭去秘書長一職嘅社民連行委季詩傑爆料話，其實補選過後，一向陰衰陽盛嘅社民連依然對周澄念念不忘，希望招攬佢入黨之餘，仲想佢喺來屆立會選舉擔大旗，夥拍長毛齊齊出選新界東。
依家喺立法會擁有三席嘅社民連，一直度緊點樣喺來屆擴充實力。據聞社民連有意讓長毛梁國雄喺下屆立會選舉退落參選名單嘅第二名，為新人抬轎，期望喺新東取下兩席，而早前喺補選中成功於新東取下逾萬七張票嘅周澄，正係社民連嘅理想人選。
不過，社民連呢個如意算盤暫時打唔響，事關雖然周澄都有意入黨，但佢家陣仲喺馬尼拉幫緊一個非牟利組織做嘢，要二○一二年初先返嚟。如果要趕及參與一二年嘅立會選舉，就未必符合到選舉條例所規定嘅最低留港限制嘞。