政情：伍家捐2000萬紀念媽姐
已故前永隆銀行董事伍絜宜嘅兒子伍步剛及伍步謙等兄弟姊妹，尋日透過伍絜宜慈善基金捐出二千萬元，支持浸會大學癌症炎症研究中心，並以「岑堯寬、岑碧泉」命名。岑氏姊妹兩個名字聽落好陌生，但原來係服務伍家一生嘅「媽姐」，湊大伍步剛幾兄弟姊妹，一直做到八、九十歲因癌病離世，為此伍家希望喺癌症方面做啲嘢，以示對兩位媽姐嘅紀念。
支持浸大癌症研究
命名典禮尋日喺浸大伍宜孫博士演講廳舉行，伍絜宜慈善基金董事伍步剛同弟弟伍步謙、妹妹劉伍步莊一齊出席，伍步謙仲帶埋太太及囝囝伍尚康夫婦撐場，而伍絜宜胞兄伍宜孫嘅仔女都有到場見證，包括四子伍步高及五女伍步翔，同浸大校董會主席王英偉及校長陳新滋一齊主持儀式。
伍步剛、伍步謙與堂兄弟伍步高都好懷念媽姐岑氏姊妹。伍步剛話，岑氏姊妹多年來照顧伍家起居飲食不遺餘力，八年抗戰期間，岑氏姊妹追隨伍家一齊走難上廣西，居於山林同甘共苦，建立咗深厚感情，一直服務伍家到終老，親如一家人。自從伍家將永隆銀行賣盤後，伍步高話無再做投資，只享受退休生活，閒時睇書、聽音樂及旅遊，當然仲會多做善事喇。