政情：劉江華左手打右手
未來兩年有區議會選舉同立法會選舉兩場大戰，政黨爭票，互相無面畀！新界東建制派兩大勢力民建聯同公民力量，尋日鬧雙胞記者會，不約而同出嚟講區內居民近日相當關注嘅單車徑安全問題，仲要撞正喺朝早十一點開記者會，傳媒去得一檔，好難再去採訪另一檔，民記同公記即係既爭票又搶客。民記副主席劉江華有份創立公民力量，依家仍然係公民力量嘅成員，兩股勢力喺新界東一向同氣連枝，尋日為博曝光宣傳開記招對撼，左手打右手，頗令人愕然。
新界東盟友變敵人
民記尋日記招由新界東立法會議員陳克勤領軍，公布新界區單車意外黑點；公民力量就由沙田區議員姚嘉俊擔旗，請嚟○一年全運會場地計分賽金牌得主何兆麟現身說法，講解沙田區內單車黑點陷阱。兩個記招唔止性質雷同，連舉行時間都撞到正，十足雙胞胎。
到底民記同公民力量事前知唔知道對方開記招呢？有地區人士話，即使佢哋互相一早打招呼，以目前形勢，估計雙方為博曝光，兩個政團都唔會讓步，雙胞胎記招照樣會發生。
據聞，過往多年一直為民建聯參選立法會新界東做大樁腳嘅公民力量，打算二○一二年唔再為民記抬轎，自己豎一支旗參選新界東，即係話，民記、公記難免成為競爭對手，兩年後一較高下。隨着區選逼近，雙方對時事議題更敏感、更進取，碰巧上星期沙田耀安邨發生奪命單車意外，區內單車徑安全問題備受區民關注，於是成為呢兩個政團首場「對撼」議題，各不相讓，不過係咪有人收到風，知道對手尋日朝早開記招，於是趕飲頭啖湯費事蝕底，就不得而知。
公民力量一直盤據沙田區，沙田四十六名區議員中，公民力量佔咗十五人。劉江華出身自公民力量，同陳克勤素被視為師徒關係，算盤打埋算係一家人，但今次鬧出單車徑安全記者會雙胞胎，鬥搶收視，咪係左手打右手？
克勤仔話，上星期四晚區內發生奪命單車意外後，民建聯已決定喺尋日開記招，同公民力量鬧雙胞，純屬巧合。姚嘉俊亦解釋，事前唔知民建聯開記招，因為尋日下午沙田區議會開會討論單車徑安全問題，所以決定朝早開記招。兩個政團都唔肯認搶票搶客，不過，到一二年立法會選舉時，大家又睇吓佢哋仲係咪可以表現到咁克制！