中環出更：英皇珠寶預展 富豪先睹為快

逾百位英皇珠寶VIP尋日齊集中環港島廳，欣賞英皇呢批價值連城珍品。英皇集團主席楊受成親迎貴賓，與太太陸小曼招呼客人，身兼英皇鐘錶珠寶董事總經理嘅千金楊諾思（Cindy）亦與弟弟楊政龍滿場飛，向客人介紹英皇嘅心血結晶。

新系列成功面世，Cindy居功不小，由佢率領嘅世界級珠寶設計團隊，花了一年時間搜羅中國歷代帝皇及傳統文化資料，以四種代表中國文化特色作設計主題，推出名為「瑰麗典藏」系列，包括以萬里長城宏偉建築作藍本，用閃爍白鑽排列出氣勢磅礡嘅「烈陣長城」鑽飾，整套價值超過一百萬元，到場參觀嘅名媛區詠梅睇到入晒神，大讚設計夠心思。

價值逾一百二十萬港元嘅「點睛飛龍」系列，係楊諾思心血結晶之一。

楊受成（左一）及楊諾思（右一）親自迎接鄭海泉夫婦睇預展。

何解咁鍾情中國元素？楊主席話，如今購買高級珠寶嘅貴客，以內地人為主，設計富中國文化精粹嘅鑽飾，更能令客人賞心悅目。

楊太（右）向身旁嘅VIP貴賓高太介紹最新設計嘅翡翠頸鏈。	醉人鑽飾當前，區詠梅睇到入晒神。	邱詠筠（左）專程嚟睇珠寶展，楊政龍親自招呼。

蔡志明買十卡名鑽吊墜氹妻

喜歡收藏珠寶及名錶嘅蔡志明，尋日專登由珠海趕返香港賀楊主席。美鑽當前，蔡志明二話不說購入三個名貴鑽石吊墜，其中一個鑲有十卡名鑽，價值約二十四萬港元。送畀邊位？之唔係太太同兩個囡囡囉。佢笑言老婆大人排第一，返到屋企會畀太太揀先喎。

滙控執行董事鄭海泉同太太拍拖嚟欣賞鑽飾，鄭太鍾情翡翠，喺飾櫃前駐足觀賞，但鄭大班未有「出手」，同卓妮賣關子話：「下次再去楊生位於尖沙咀嘅珠寶店再睇過。」唔通佢想靜雞雞揀份神秘大禮畀太太？低調富豪邱德根孫女邱詠筠（Winnie）同妹妹邱詠賢齊到賀，Winnie畀場內一隻價值五十多萬元嘅紅寶石手鈪所吸引。卓妮問佢會否扑錘，Winnie甜笑話：「要睇吓價錢先。」果然精打細算。

今次展覽為期三日，由尋日（九日）起至明日（十一日），想欣賞難得一見嘅珍品，就咪錯過嘞。