天橋油污遍地冇人理
將軍澳居民陳先生每日均會取道將軍澳廣場外天橋前往將軍澳運動場晨運，早前陳發現有維修工人正維修天橋，直至近日已完成工程後，地面卻遺留大量油污，「搞到條天橋咁污糟都唔整番佢，乜做工程可以奉旨留低污漬咩？」
西貢區議會地區設施管理委員會副主席吳雪山指出，早前天橋曾進行油漆工程，懷疑點滴狀的油污乃工人於髹天花時滴下，但一直無人清理。吳批評路政署將工程外判後不作監管，令不斷有工程需要「執手尾」，「啲油滴到四周圍都係，好明顯個工程做得好求其，仲要做完都唔理，仲唔係監督有問題？」
路政署發言人未有就油污形成原因作解釋，只稱證實天橋上遺留有油污痕迹，已指示承建商安排清洗。