特區政府行事唔係常人可以理解，上年底香港經濟開始喺金融海嘯黑暗隧道漸見曙光時，煲呔曾突然提出「雙底衰退」論，預言今年中經濟有可能再衰退，鬍鬚曾曾俊華隨即大唱雙簧配合，恫嚇港人。事實證明，佢哋嘅水晶球唔靈驗，鬍鬚曾尋日喺網誌首度認衰，承認「全球經濟出現二次探底的機會看來已經降低」。香港樓、股騰飛，財金界預測起碼仲有半年當炒，鬍鬚曾依家先話雙底衰退機會唔大，真係後知後覺！
鬍鬚曾尋日喺網誌撰文，談論最近外國寬鬆同緊縮財政政策分別對香港有乜嘢影響，全屬「阿媽係女人」嘅道理，無甚可觀，但就喺洋洋字海之中，好唔起眼咁「攝」咗一句：「全球經濟出現二次探底的機會看來已經降低」，為港府吹大咗嘅「雙底衰退」論補鑊認衰。既然雙底衰退論已破，政府再唔能夠以外圍經濟有好大隱憂做藉口拒絕派糖，明年三月預算案鬍鬚曾應該識做，大力拉近貧富懸殊，做番啲好事喇。