日本駐港總領事隈丸優次上月履新，呢位日本資深外交官緊跟傳統，日前致函包括傳媒在內嘅香港各界朋友，正式打個招呼，呢封英文信件提到佢同香港淵緣甚深，七五年加入外務省不久，已被調派香港工作，佢嘅中文就係嗰陣時喺旺角啲補習社學番嚟嘅。
隈丸優次通曉中文，歷任日本駐華大使館參事、公使，○五年擔任上海總領事，不時就中日關係問題發表意見，係一位精通中日關係嘅資深外交官。隈丸優次○八年調派泰國，上月來港出任駐港總領事，佢喺信中提到，原來佢嘅外交官生涯亦係由香港做起點，廿幾年前佢被調派來港之後，去旺角啲語言「學校」學中文，雖然功課繁忙，但平日仍會抽時間四圍逛，享受香港嘅自由氣息，今次重臨，覺得東方之珠光芒更勝往昔。
中日關係近期因釣魚島事件再起波瀾，隈丸望今次履新能強化中日關係喎。