政情：楊國佳：最緊要套戥
熱錢湧港，樓股齊飛，雖然唔少高官出口術，聲言市況已出現泡沫，但小市民依然炒個不亦樂乎。縱橫金融界多年嘅工廈大王楊耀松兒子楊國佳（Alexander）分享亂世自保秘笈，就係多做套戥。佢認為唔少港人嘅投資方向太單一，不是買升，就是買跌，風高浪急下，好易輸大錢。
盛傳家族身家逾百億元嘅楊國佳，投資眼光獨到，曾喺滙豐股價跌至恐慌性低位時撈底，持貨至今。早前佢出席一個公開活動，大談近兩年都是以套戥方式投資，既買升，也買跌。佢舉例話，喜歡將滙豐用作投資衍生工具嘅實貨，同時玩decumulator，賺取當中差價。
反傳統智慧去投資
呢個時候，就要用反傳統智慧去投資，Alexander話，切忌羊群心態，比如當近日市場一窩蜂看淡美元，追捧澳元時，佢反而唔敢睇得太淡，因為大戶最愛玩把戲，放風引人投注喺某一方，然後反其道而行，大殺三方。至於時間點掌握，Alexander始終都係嗰句，投資前記緊做足功課！