政情：立會保安怨氣沖天

立法會保安過去默默耕耘，不過份工喺近年已經愈嚟愈難頂，除咗逢星期三嘅立法會大會例必加班外，平日都隨時有OT需要。唔單止咁，政府施政不得人心，社會怨氣一觸即發，好似高鐵、政改，以至最低工資，議會內外均有示威衝突，立法會保安要堅守崗位維持秩序，只能首當其衝。社民連三子殺到後，佢哋經常喺議事堂做騷，同保安嘅肢體接觸時有發生，喺混亂之中，保安又曾經整損手、撞親腰，最慘佢哋三位又係尊貴嘅議員，想投訴佢哋又好似於禮不合，保安敢怒而不敢言。

險爆工業行動

雖然一直以嚟，立法會保安都有超時補水制度，比唔少得個做字嘅打工仔好，不過由今個立法年度開始，佢哋申請補水嘅手續繁複咗好多，除咗要事前申請外，仲要解釋原因，一眾保安一時間難以適應，事關好多時加班都係臨時需要，根本無法預計。更令佢哋氣結嘅係，一旦病咗要放病假，秘書處就將佢哋嘅病假計埋落超時補假嚟放，變相剋扣咗佢哋嘅補假。

據講以前秘書處唔同部門有唔同做法，依家各部門申請補水都用統一表格，令文件工作驟然增多。其實咁都係為咗令運作更為制度化，日後搬去添馬艦新大樓，保安大增，更加唔可能冇規冇矩。總之規矩執行得嚴咗，自然反彈就多咗。歸根究柢，特區政府同班議員都有責任，若果政府推出嚟嘅政策得人心，議員又少啲無謂嘅爭拗，社會怨氣自然減少，打工仔捱都捱得順氣啲啦！

聽聞保安早前諗過發起工業行動以示不滿，最終就走咗去敲工聯會立法會議員王國興嘅門，搵議員為佢哋出頭，經過一輪斡旋，紛爭得到平息，病假無再被當成超時補假放，一場由立法會內引爆嘅勞資問題得到解決。原來立法會保安有怨氣，始終都係由立法會議員搞番掂。