中環耳目：金勞詹淺嘗五両靚蟹公
踏入農曆十月，大閘蟹當造。識飲識食嘅立法會金融服務界代表詹培忠早前去咗出名蟹靚嘅中華出入口商會大快朵頤。金勞詹出手闊綽，唔靚唔食，佢揀得嘅隻隻都係有五両重，絕對係真材實料。不過金勞詹以身體為重，食一隻過吓癮就算。
識歎大閘蟹嘅人都知道「九月圓臍十月尖」，意思係農曆九月食雌蟹、十月食雄蟹嘅道理，金勞詹品嘗嘅正正係蟹膏軟滑嘅雄蟹，佢話之所以揀中出會所歎蟹，除咗因為呢度蟹嘅質素有保證，亦都同其他配套不無關係，事關食大閘蟹必須配以鎮江醋，中出會所係以秘方烹調，加上佢哋用老薑、杞子同元肉嚟炮製嘅薑茶，真係食多幾隻都唔怕寒。
不過話雖如此，前年金勞詹證實患癌，大閘蟹呢啲膽固醇咁高嘅食物都係適可而止好啲，難怪佢幾鍾意食都好，只係淺嘗一隻就算。