中環出更：靳家聚首香江聯辦藝術展
知名藝術家靳棣強嘅藝術天分係人都知，但靳氏族人個個才華橫溢，就真係唔講唔知。上周四靳氏十幾位家族成員齊齊舉辦藝術展，一眾賓客對靳氏族人嘅遺傳基因嘖嘖稱奇，中聯辦宣傳文體部部長郝鐵川更加笑稱，研究咗好耐先至搞清楚佢哋嘅關係。
靳棣強嘅細佬杰強講起今次搞聯展嘅因由，始於三年前佢由美國返港舉辦畫展，佢嘅堂妹寶潔提議不如搞個靳氏族人畫展，籌辦咗兩年終於成事。今次藝術展，散居於中、港、台、美、加同埋歐洲嘅家庭成員都返港參展，連已經仙遊嘅長輩畫作都參展埋一份。
令郝鐵川信遺傳基因
靳棣強話，今次除咗以藝術會友之外，最珍貴嘅係成家人有機會聚首一堂，好似杰強就同近四十年未見嘅堂妹羽屏重逢，大家有幾激動不難想像。
郝鐵川來自上海，佢對喺上海發展嘅靳羽西最熟悉，佢太太更加係羽西嘅粉絲，事關羽西有自己品牌嘅化妝品、家品設計，喺上海家喻戶曉。郝部長又話，佢原本唔信遺傳基因呢回事，但今次睇到靳家人才濟濟，不得不信啦！
靳棣強就謙稱佢哋係受到環境影響，好似佢哋兩兄弟細個成日睇爺爺為廟宇畫壁畫，先至啟發佢哋嘅潛能，依家佢嘅囡囡做社工，囝囝就喺網上講波，按自己興趣發展，未必同藝術有關㗎！
卓妮