中環出更：Tim霍逛Prada 買靚褲過年
名牌世界花花綠綠，好難專一，但身兼立法會議員嘅港協暨奧委會會長霍震霆（Tim）就對Prada一往情深，行街幾乎係「只此一家」，為咗買一本Prada記事簿，近月頻頻「巡舖」，就算買唔成記事簿，都要買番條Prada褲，咁專一，卓妮都要寫個服字。
上月底先逛完Prada嘅Tim霍，上星期日又再心思思出動，見晏晝五點幾有空檔，佢着住Prada皮鞋一身黑衣打扮，快步走入歷山大廈間Prada專門店，一心想搵恨咗個幾月嘅記事簿，點知望完一輪，原來新貨仍未抵港，唔通又白行？！
巧遇陳幼堅 雞啄唔斷
不過入得Prada又點會空手而回？Tim霍瞄到貨架上有幾條冬季休閒褲，最後忍唔住手入貨。等候店員包裝貨品期間，Tim霍竟然撞到著名設計師陳幼堅（Alan），世界真係細，兩人睇嚟老友鬼鬼，傾到雞啄唔斷，唔通Tim霍趁機請教扮靚心得？！
五分鐘後，店員將貨品包到靚靚遞上，Tim霍同Alan道別離開舖頭。到底Prada有乜吸引？Tim霍笑騎騎話畀卓妮知：「係呀，諗住買條褲過年嘛！」吓！Tim霍成屋都係靚衫，使唔使專登買褲過年？真係識講笑，況且有排都未過年。咁佢何解要買休閒褲？「我去親嘅地方都好休閒，所以咪着休閒褲囉。」Tim霍都有佢幽默嘅一面。
卓妮