區議會選舉明年就殺到嚟，一向以功能組別議員為核心嘅經濟動力，亦有意喺區選分一杯羹，計劃派出十幾個舊人與新血出戰。經濟動力乃由自由黨分裂出嚟，將來隨時要喺選舉中拗手瓜。經濟動力核心林健鋒（Jeffrey）尋日就強調同舊黨友再見亦是朋友，即使派人出戰區選，亦未必會追住舊黨友嚟打，而且佢同舊黨友方剛、張宇人同周梁淑怡等仲有偈傾。不過佢話經濟動力暫無意轉為政黨。
Jeffrey話，經濟動力近日吸納咗唔少同佢哋理念一致嘅年輕人、專業同中產人士，明年會打正工商專業旗號，派十幾人出戰區選，同其他泛民建制候選人撼過。
早前盛傳經濟動力有意拉攏獨立議員龐愛蘭加盟，Jeffrey尋日唔肯證實此事，只係話任何人如果要代表經濟動力出選，唔可以插住幾支旗喺身，莫非暗示經濟動力同現時掛住Ｃ18同新論壇招牌嘅龐愛蘭無緣？