政情：方剛錯將鮎魚當鯉魚
被喻為五百年一遇嘅強颱風鮎魚早前竄擾香港，雖然最後打唔成兼且走咗好幾日，但呢個颱風居然考起議會內幾位尊貴立法會議員。經過傳媒過去一星期鋪天蓋地嘅報道，大家理應識讀「鮎魚」個「鮎」字，點知尋日唔少議員竟然誤將個「鮎」字讀錯晒，將呢個世紀颱風變成其他魚類！
立法會尋日繼續辯論施政報告，會計界議員陳茂波發言時就提起「鮎魚」早前過門而不入。可惜佢有邊讀邊，將個「鮎」字讀咗做唔知係乜嘅「占」魚，聽到大家呆晒。其後自由黨議員方剛仲離譜，連邊都唔睇，九唔搭八地將鮎魚讀成鯉魚，究竟方剛當時係發緊夢吖、定係太掛住禮賓府入面嗰啲鯉魚呢？
嶺南大學中文系助理教授陳雲同我哋講，「鮎」嘅讀音係「黏」嘅第四聲「nim4」，寫唔到出嚟，所以好多人會讀錯咗做「黏」、「廉」，甚至「占」。台灣方面為咗減少混淆，索性將「鮎」字改做「鯰」，讀音都係一樣。