政情：金勞詹陳健波唔認購AIA
「巨無霸」新股友邦保險（ＡＩＡ）今日上市，全城矚目，備受股民熱捧。不過，本身從事證券生意嘅金融服務界議員詹培忠同保險界代表陳健波，尋日不約而同話無認購。ＡＩＡ呢隻「集資王」新股，好多人睇好，點解佢哋唔吼呢？
謀定而後動 嫌申報麻煩
波哥為瞓身議會工作，九月份起放棄慕尼黑再保險公司香港分公司行政總裁一職，轉任顧問，即係同ＡＩＡ分屬同行，佢唔抽ＡＩＡ新股，唔通真係同行如敵國？非也，波哥解釋，佢最近議會事務太忙，加上自己鍾情中資股，所以咪無入飛抽ＡＩＡ新股囉。佢又話，依家股市個浪已經升到好高，可能有回潮迹象，謀定而後動，遲啲再入飛都未遲。
至於金勞詹，無認購ＡＩＡ就純粹為慳工夫。金勞詹申報利益，話自己係公司機構投資者，唔愁不獲配股，優惠折扣未必有，但如果佢想要貨，就肯定有得揸手。不過，佢自覺係公眾人物，利益申報一定要好謹慎，佢懶得花工夫搞申報，索性唔攞ＡＩＡ配股，食少多覺瞓！