政情：裕華國貨浸大「開張」
身為香港國貨老大哥嘅裕華國貨近年化整為零，改開專門店，最近仲開到去浸會大學，今次唔係賣國貨，而係作育英才，捐出五百萬元予浸大開展當代中國研究及擴充校園，而浸大就將一個演講廳以「裕華國貨」命名。裕華國貨董事長總經理余國春率領弟弟余鵬春、妹妹余小春及堂兄余在春，一齊出席尋日舉行嘅命名典禮，與一眾嘉賓回味昔日體育堂必備嘅「白飯魚」。
裕華國貨演講廳「開張」，福建幫頭領盧文端、廣東社團總會主席王國強、潮屬社團總會主席許學之、前港區全國人大代表陳有慶及兒子陳智文等好友都去撐場。余國春慷慨支持浸大，原來浸大校長陳新滋同浸大基金主席王英偉都撐裕華國貨，學生哥年代上體育堂同落場踢波必備國產「白飯魚」波鞋，黑咗就用白鞋油髹番靚，着到爛就去裕華買過第二對，真係唔講得笑。
今次浸大將演講廳命名為裕華國貨，好多學生都笑話以後要去「裕華國貨」上堂，索性話去「裕華」就得喇。余國春就唔同意，話「裕華」兩字係富裕中華咁解，但富裕中華背後由國貨帶動，所以堅持要用晒「裕華國貨」四個字喎。