政情：葉劉組黨封蝕本門
匯賢智庫主席葉劉淑儀組黨如箭在弦，葉太尋日接受訪問時聲稱，組黨嘅目的，係為日後參選區議會同立法會更加名正言順，旗幟分明。不過，有資深親中人士分析，葉太選擇此時籌組新政黨，眼光實不僅於地區直選，而係劍指二○一二年特首選舉，而且葉太已經打過算盤，封咗蝕本門。消息話，葉太如果能挾政黨機器落場跑馬仔，固然係得償所願；即使遭人勸退，喺現今政治生態下，亦幾乎肯定得到中央「等價補償」，隨時獲下屆特首延攬入閣，躍身行政會議成員。
暫名「新民黨」
據悉，葉太計劃喺十二月成立嘅新政黨暫名「新民黨」，專攻中產專業路線，最近葉太全力狙擊《競爭法》，就係要為創黨先壯聲勢。葉太對外解釋組黨原因，主要圍繞議會層面嘅選戰角度嚟講，但親中陣營之內，多認定葉太組黨，背後仲有更遠大嘅目標。
政界流傳，煲呔曾○九年初為行會「換閣」之時，西環曾轉達一個訊息畀佢，希望能安排葉太躋身行會，只係當時葉太剛進身議會，又無政黨背景撐腰，煲呔曾最終無答允。不過，按常理，西環無理由主動做紅娘，外界估計其實係葉太有意進身行會機會大啲。
親中陣營分析，葉太要開拓區會同立會版圖，匯賢智庫班底已經夠用，此時籌組新政黨，實為壯大實力同聲勢，以便喺一二年特首跑馬仔賽事中，同其他對手爭一日之長短。葉太與其他現時流傳嘅疑似特首候選人不同之處，係佢基本上獨立於西環及港府，不受羈絆，所以葉太堅持落場選特首嘅機率，反而比其他人更高。
當然，葉太創立政黨，唔代表就有能力摘取特首冠冕。消息分析指，如果葉太參選，造成嘅客觀事實，就係搞亂整個中央布局，為整個選戰增添不可預測嘅變數，尤其民主派好大機會派人落場競逐特首。中央一向對特首選舉安全系數要求極高，不願見到任何潛在風險，喺咁嘅情況，中央屆時好大機會出手勸退葉太，葉太分分鐘亦可借此機會討價還價，所以，算盤打落，葉太組黨係咪一套封咗蝕本門嘅必賺生意呢？