中環耳目:KK歎自家菜為伙記打氣

旅發局再次喺西九海濱長廊辦「香港美酒佳餚巡禮」,尋晚正式開幕。卓妮一向嘴刁,於是去先食為快,點知畀卓妮撞到金陶軒老闆、港區全國政協委員王國強(KK)去巡視店舖攤位,為伙記打氣!

金陶軒近年喺旅發局主辦嘅「美食之最大賞」屢獲大獎,今年再下一城,啱啱憑「脆皮椰子雞」同「紫袍羅漢會龍皇」兩道名菜,分別勇奪今年「美食之最大賞」賽「雞組」同「海鮮組」嘅至尊榮譽大獎,來個雙響炮。

田少帶隊試黑毛豬

尋日「香港美酒佳餚巡禮」開幕,金陶軒都有攤位喺度,身為老闆嘅KK尋晚仲現身為員工打氣兼巡視,仲即場品嘗佢哋至尊金獎大廚炮製嘅「秘汁魚蛋」。呢道美食以東南亞「是拉差」辣椒汁、椰汁同魚露熬製而成,KK食得津津有味,仲大讚啲魚蛋好味道。

「香港美酒佳餚巡禮」係旅發局主打項目,主席田北俊中午率先帶傳媒參觀展攤,行到火腿極品西班牙黑毛豬腿展攤時,各人都畀美味嘅豬腿吸引,但田少定力十足,只係食咗兩三片,仲回憶話,以前曾經喺西班牙買過一隻黑毛豬腿,空運返香港試,點知腿身好難「片」,屋企工人切到手軟。對有指黑毛豬嘅脂肪係橄欖油,有助降低人體膽固醇,田少半信半疑,難怪佢尋日無被黑毛豬腿嘅魅力攝住。

財政司司長曾俊華尋晚亦現身主禮,曾經因心臟病發入院搶救嘅佢,美食當前,懶理健康,狂試芝士、小籠包、火雞同燒火腿等高脂美食。田少批評過鬍鬚曾係「孤寒財主」,不過,鬍鬚曾尋晚話晒係客人,田少放佢一馬,無趁機開炮轟佢。

卓妮

Money18新功能「18好路數」為你預測心水股票升跌機會率