中環出更：甜湯周街踱一支公食飯
廉政公署前日朝早落案控告前立法會議員譚香文涉嫌選舉舞弊後，咁啱得咁蹺，卓妮當晚七點鐘就喺中環域多利皇后街遇到廉政專員湯顯明（甜湯），見佢喺條街度行來行去，似乎係等人攝時間，之後佢行到皇后大道中仲望上樓上嘅廣告招牌，唔通搵餐廳約會佢女友入境處助理處長陳詠梅（Helen），一齊食飯撐枱腳？
甜湯一見卓妮，就話啱啱剪完頭髮，諗住搵間餐廳食晚飯。咁係咪同女朋友撐枱腳呢？甜湯聽到後人如其名一樣笑到甜絲絲，然後同卓妮講：「自己食啫，唔好問呢啲問題啦！」佢仲話之前廉署開放日因為颱風鮎魚影響而改期，所以晚飯後要趕返廉署搞埋啲籌備工作，跟住就同卓妮講Bye Bye離開。
叫女友唔好現身？
不過，卓妮見甜湯無即時去食飯，反而行番落域多利皇后街間三聯書店睇書，睇咗大約二十分鐘，期間仲見佢用手掩住個電話傾密偈，莫非通水叫女友唔好現身？甜湯最後買咗本六十元嘅《放聲高歌－聲樂唱法入門》嘅聲樂教學書，莫非想唱好情歌冧女友？抑或本書買畀琴棋書畫樣樣皆精嘅女友呢？
講開睇書，甜湯同卓妮講，自己鍾意睇文靜啲嘅書，諗住唔識聲樂睇完本書都可以知少少，學多啲嘢喎。甜湯再次同卓妮講Bye Bye後，去咗隔籬間露斯餐廳食飯，一支公撐住四隻枱腳。
近期傳出深圳海關向攜帶iPhone及iPad等高科技產品嘅過境旅客徵稅，搞到怨聲載道。卓妮前晚都有問過甜湯，佢就以前海關關長身份話，中國海關對科技產品徵稅一向存在，只係依家嚴格執行啫，可能係想打擊水貨客；不過甜湯希望中國政府發出明確指示，佢話咁樣會好啲喎！
卓妮