金融海嘯過去兩年了，香港人對雷曼兄弟及投資產品引發嘅災難關注都急降。尋日立法會調查雷曼事件嘅小組再開會，第四度即最後一次傳召出售雷曼產品最多嘅中銀香港高層作供。開會前又有兩個逃兵出現，一個係專業會議嘅劉秀成，另一個係怪醫梁家騮。我哋早前講過，立法會議員嘅熱情已過，有人做逃兵外，遲到早退嚴重，出席率仲好低，難怪銀行界怨聲載道。
小組一早話明尋日嘅聆訊可能由朝早玩到晚，因為佢哋想了結中銀嘅聆訊，點知議事廳內外水盡鵝飛，議員唔多，採訪記者亦少。立法會秘書處資料顯示，入咗暑假後，先有白鴿黨副主席劉慧卿於八月廿三日要求退出小組；復會後，劉秀成十月十四日又要求退出；同月廿一日、即今次聆訊前兩日，怪醫亦忽然告別，趕得及唔出席尋日聆訊。走走吓，小組成員有九個人退出。
劉秀成解釋，復會後佢要做發展小組主席，又肩負海濱事宜等規劃工作，兼顧唔到。怪醫嘅離開，唔知同佢離開醫管局搵真銀有冇關係？回想兩年前雷曼小組成立時，立法會議員群情洶湧，有近三十人舉手，最後組成廿七人嘅大調查小組，點知兩年下來，依家只係剩番十八人！