政情：陳維安籲青年北上
教育局副局長陳維安（Kenneth）自爆，現時深受股民喜愛嘅中國平安保險（上市編號：2318）總經理張子欣，原來係佢廿年老友，兩人喺九十年代仲一度做過同事添！陳維安尋日出席一個青年團體嘅交職典禮，與幾十位師生真情對話，為咗說服青年人多啲去內地闖天下，講起自己同張子欣嘅故事。
以張子欣做例子
原來九三年Kenneth同張子欣一齊喺一間管理顧問公司工作，為一啲國際企業提供進軍內地嘅資訊，當時張子欣抓緊機遇去咗內地，加入中國平安保險。佢話，九三、九四年嘅平保主要做一啲生仔生女嘅保險，或者火箭發生意外嘅保險，屬於一間願意冒險嘅保險公司，張子欣見到內地有市場，對個人有好好發展機會，毅然加入平保。
不過Kenneth話鋒一轉，話香港人既了解中華文化，又了解西方文化，正係優勢所在，佢語重心長話：「年輕人點都要去內地闖一闖！」佢相信，在坐三分一或者二分一青年，將來都會去內地發展。回望過去，張子欣嘅選擇當然無錯，但唔知無選擇返內地發展嘅Kenneth，又會點睇自己嘅選擇？