政情：莫宜端「賣友」推銷政策
一班副局及政助為爭取表現各出奇謀，好似勞工及福利局局長政治助理莫宜端（Zandra），曾經為證明自己環保而自爆囝囝使用可清洗嘅環保尿褲。尋日佢出席婦女動力協會舉辦嘅婦女精神健康大使計劃活動時，又借以前傳媒朋友患上精神病嘅經歷，來推銷局方嘅精神健康政策。
梁卓偉變師奶殺手
Zandra話，以前做傳媒時識得有個行家好友患上精神病，佢於是不斷給予支持，朋友終於喺幾年後康復，重投工作崗位，過程中令佢明白，一個人精神健康出問題，除咗治療外，家人同朋友嘅支持先至係最大強心針。講到最後，Zandra話當局嚟緊會就有關問題「大做特做」，宣揚精神健康訊息。
同場仲有食物及衞生局副局長梁卓偉，佢就向一眾婦女狂笠高帽攞分，話收到婦女動力協會副主席麥美娟來電邀請後，隨即答允出席活動，又幽默話婦女嘅強勁「力場」令活動可以喺風和日麗之下舉行，冧到在場婦女拍晒手掌，極受歡迎。睇嚟政界今後又多個師奶殺手嘞！