政情：女童軍一姐兩大熱角逐
香港女童軍總會早前鬧出高層人事任命違規風波，被揭○七年「超齡」就任嘅總監邊陳之娟，違反總會指引列明總監人選不得超過六十五歲嘅規定，明年四月任滿肯定無得留低，接棒人選引起名媛界關注。接近女童軍總會消息人士透露，芸芸女童軍高層中，現時以「福布斯」富豪、中華總商會會長蔡冠深嘅太太蔡關穎琴同女童軍副總監彭徐美雲最有機會當選，成為下屆女童軍「一姐」大熱。
女童軍總會下屆總監候選人提名期本來已經截止，而且只係收到一個提名，就係邊太。依家邊太連任「甩轆」，總會高層本周三（廿七日）會再開會「執漏」，商討延長下屆總監嘅提名期，確定日子後隨即接受提名，一場名媛界競賽亦隨之展開。
消息透露，現任女童軍總會港島地方協會會長蔡關穎琴，被視為下屆女童軍「一姐」大熱，蔡太丈夫並非別人，正係近年喺親中政商圈子相當活躍嘅中總會長、新華集團總裁蔡冠深。如果蔡太最終真係做埋女童軍「一姐」，夫妻二人以後更加各有各忙。
多才多藝VS熟悉會務
蔡太本身係律師，辯才出色，曾擔任女律師會會長，隨着丈夫喺政商界舞台愈走愈前，蔡太嘅身影近年亦頻頻曝光，好似早前為關注年輕人吸毒問題，就以女童軍港島地方協會會長身份，搞咗個「無毒新SING」歌詞創作比賽，又喺老公支持下成立「垂誼社」並親任主席，由世界著名大提琴家李垂誼出任藝術總監，以支持本地演藝事業。
女童軍會內另一位被認為有機會出任總監職位嘅人選，係現任副總監彭徐美雲。彭太約五年前開始參與總會高層決策，熟悉會務，丈夫係公益金名譽副會長彭曉明。蔡太同彭太最終邊個跑出接任總監，要睇過至知，不過，有樣嘢可以肯定，就係二人仲有幾年先至夠六十五歲。
年齡係每位女士嘅最大秘密。不過，女童軍總會今次就係因邊太「超齡」就任呢個秘密被踢爆，鬧出風波，佢哋揀接任人，第一個要甄別嘅條件，可能就係候選人嘅「年齡」，唔係再爆多一劑，點同外界解釋？