中環出更：林健鋒推崇隱世廚神
位於中環九如坊蘭桂坊酒店一樓嘅「名人坊」（Celebrity Cuisine）中菜館，開業已有三年，地方雖小，但名人食客如雲，大多慕名一嘗「隱世廚神」鄭錦富（富哥）嘅首本名菜。富哥嘅名菜要幾豪有幾豪，要特色有特色，但離不開「新鮮合時」四個字，單是挑選海鮮食材已相當講究，淨係蒸焗魚雲及鮮蝦餃，已經迷倒立法會議員林健鋒（Jeffrey）。
富哥嘅「蒸焗魚雲」之所以咁吸引，皆因選用大條新鮮淡水魚，而且製法獨特，棄用外間先炸後焗嘅方式，反而先將魚雲蒸香後再焗，蒸嘅過程可保留魚嘅鮮味。Jeffrey早前就同香港總商會一班核心拉大隊去幫襯富哥，特別訂定六條每條重逾六斤嘅新鮮淡水魚，目的只為每人享用半個蒸焗大魚嘴，可以想像富哥嘅海鮮有幾咁吸引。
名人食客 絡繹不絕
Jeffrey又推介富哥嘅點心「鮮蝦餃」，佢大讚大大粒皮薄餡靚，每隻蝦餃含六隻新鮮大海蝦，食落鮮味爽口。富哥另一味「蒸焗魚腸」同樣受食客歡迎，呢味菜用足料，每缽使用三斤魚腸，保證啖啖魚腸。魚腸本身好油膩，所以富哥會先用薑葱水滾走肥油，再加入其他食材放入缽仔蒸焗，食起來無咁油膩，亦可辟走魚腸腥味。
富哥係廣東寶安人，七三年入行，「紅褲子」出身，曾經喺銅鑼灣紅寶石酒樓及筲箕灣洞天酒樓學師，七五年到遠東交易所會所做二廚，期間認識好多社會名人，更獲富商重金禮聘富哥任私人大廚長達二十年，享有「隱世廚神」美譽。富哥嘅特色菜多不勝數，包括燕窩釀雞翼、金錢蟹盒、鮑魚扣鵝掌、薑汁芥蘭、富哥炒飯等。
「名人坊」開業三年間，名人食客絡繹不絕。卓妮打開放喺門口本留名冊，同富哥合照嘅名人包括恒基地產主席李兆基及新抱徐子淇、利豐集團主席馮國經、長實集團副主席李澤鉅、新鴻基地產副主席郭炳聯、富士攝影器材主席孫大倫、遠東發展副主席邱達昌一家、華懋集團管治委員會主席龔仁心夫婦、醫管局主席胡定旭、保安局局長李少光、貿發局主席蘇澤光、滙豐亞太區行政總裁王冬勝、最美麗港姐朱玲玲等等，仲有好多政府高官去幫襯，多到不能盡錄。
卓妮