政情：攞命陳穩陣大過天

人稱「攞命陳」嘅金融管理局總裁陳德霖，尋日喺一個午餐會上，被港區全國政協委員劉夢熊當場質疑外匯基金表現一般。劉問佢點解新加坡主權基金上半年回報率有四成二，但外匯基金就差強人意。攞命陳「大」番劉夢熊轉頭，話香港外匯基金主要為穩定發鈔市場，投資要穩健，唔係追求利潤，即係要穩紮穩打咁話；仲話邊個可令外匯基金回報大升而風險又唔增加嘅，金管局重重有賞。攞命陳show hand，在場人士無人敢跟。