政情：黃宜弘自貶冧老婆
全國政協常委會尋日正式通過今屆政協委員增補名單，正如我哋前日預告，總共增補咗二十三人，港區佔三人，包括立法會議員黃宜弘太太梁鳳儀、沙田區議員簡松年及九龍城委任區議員王惠貞。內地增補委員則有前國務院總理朱鎔基女兒朱燕來、原國務院國資委主任李榮融、貴州省省長林樹森、中國佛教協會會長傳印長老、銀泰百貨集團董事長沈國軍等。
人稱「才女」嘅梁鳳儀榮升政協，身為丈夫嘅黃宜弘都好開心，仲自貶冧太太：「依家太太知名度高過我，社會地位高過我，你話我會有乜感受吖？」佢又話，太太本身有好多業務纏身，現在加多項公職，希望太太唔好太疲累，果然係「愛妻號」。黃宜弘做過人大代表，會否傳授經驗畀太太呢？佢話太太好多事都做得好好，唔使佢教喎。
本身係全國政協委員嘅前中大校長劉遵義，獲增補為政協人口資源環境委員會副主任，地位等同全國政協常委，加上佢近日獲委任為中投國際（香港）主席，睇嚟好受中央重視。