政情：嫻姐鬧爆施政報告
新一份施政報告蜻蜓點水，未能確切回應社會對置業及福利方面嘅訴求，「置安心」計劃淪為「置灰心」計劃，連工聯會嘅前立法會議員陳婉嫻，尋日現身立法會時都批評份施政報告「力度甚為不夠」，六大產業虎頭蛇尾。
盛傳會角逐下屆立法會超級區議會議席嘅嫻姐，尋日突然現身立法會，話約咗其他工聯會兄弟開會傾吓立法制訂標準工時問題。一提起新一份施政報告，嫻姐即時回復昔日本色，逐一批評施政報告嘅不是。佢話政府雖然有聽到社會意見，但大家關注嘅貧窮問題仍然無處理到，六大產業又隻字不提，所以仍然有好多嘢要鬧。
嫻姐又話正打算送本書畀煲呔曾讀吓，本書寫南韓總統李明博做首爾市長時整治清溪川嘅經驗，話佢即使得百分一機會咁細，都冇放棄，莫非嫻姐想煲呔曾都學吓李明博？不過嫻姐話正煩惱點樣當面送畀煲呔曾喎。其實嫻姐做番議員，自然有大把直諫嘅機會啦！