政情：鮎魚吹停協進會高球賽
香港友好協進會主辦嘅一年一度港區全國政協及人大活動日，原定今、明兩日喺霍英東家族旗下嘅廣州南沙高爾夫球會舉行，大家較技聯誼，可惜遇着來勢洶洶嘅颱風鮎魚吹襲。雖然鮎魚愈吹愈遠，但雲帶影響廣東落雨，搞到協進會要取消場波。人大政協個個都係大忙人，睇怕再夾時間搞過都好艱難。
據聞今年高球賽參加者依然踴躍，除會長陳永棋打頭陣外，仲有福建幫頭領盧文端、林健鋒、梁君彥等協會核心，中總永遠榮譽會長霍震寰則以球會主人家身份出席，因為今次由霍家贊助。今年協進會仲請來全國政協副主席鄭萬通主禮，其他嘉賓就有中央統戰部副部長尤蘭田、中聯辦副主任黎桂康、周俊明及黃蘭發，仲有全國僑聯副主席王永樂等；至於去年有參賽嘅中聯辦主任彭清華，據聞現時身在中央黨校進修，未能抽空出席。可惜場波取消咗，未能欣賞一眾好波之人顯身手。