政情：高達扮蝙蝠俠似足企鵝
民主黨立法會議員李永達同涂謹申，尋日變身蝙蝠俠與羅賓現身立法會，唔講仲以為立法會提早慶祝萬聖節。非也！原來佢兩個聽日將參加第五屆「鼠戰中環」慈善賽跑。
漫畫同電影中嘅蝙蝠俠高大威猛，由「高達」李永達扮演有點牽強，難怪佢嘅黨友黃成智見到，都抵唔住頸寸高達似扮緊奸角企鵝多啲！
「鼠戰中環」係一個推廣中港兩地精神健康嘅籌款活動，參加者可以扮鬼扮馬咁參賽。今次扮成蝙蝠俠與羅賓原來係阿涂嘅意思，事關佢話佢同高達係「正義嘅朋友」喎，套衫更加使咗佢成千蚊㗎！做正義之士原來都要付出代價。
六舊腹肌升上心口
被迫扮成蝙蝠俠嘅高達造型非常趣怪，佢件衫上面嗰六舊腹肌其實升到上心口位置，搞到佢整個人不成比例。高達仲呻話件衫好焗，焗到佢滿頭大汗。
路過嘅黃成智不以為然，掩住半邊嘴喺度笑高達似企鵝多啲，搞到身為蝙蝠俠拍檔嘅羅賓阿涂即時捧腹大笑。佢兩個人一度打算着住套衫入議事堂開內會，但最後都係頂唔順換番套衫出嚟，否則可能係蝙蝠俠與羅賓首趟闖立法會。