政情：梁美芬李慧琼變炒樓富婆

專業會議嘅梁美芬喺○八年進身立法會時，申報共有六個物業，西半山、九龍西同新界西各持有兩個。喺今年九月二十七日爆出發叔漏報風波後，就喺翌日、即九月二十八日，梁向立法會申報，去年一月至今年三月做過三項物業賣買，好明顯，佢同發叔一樣漏報補飛。

根據梁嘅最新個人利益登記，去年一月金融海嘯後，佢出售咗九龍西一個單位；但三月又買入九龍西一項物業，同月再賣出同一棟大廈另一項物業。梁美芬解釋，舊物業殘舊，難以租出，所以出售；喺同一大廈買番間質素高嘅單位，樓換樓，有利作長遠收租投資。至於去年一月出售嗰一間，全因金融海嘯爆發，減持手上現貨，減低損失，當然事過境遷，過去年半樓價升到快過直升機，嗰次低位放樓，佢話當交學費。

睇好後市卻賣樓

紀錄顯示，同樣循九龍西入局嘅民建聯議員李慧琼（Starry），○九年十月同丈夫喺香港島同九龍區共同擁有四個物業，今年五月賣出一個。本月三日Starry再向立法會更新申報，話再賣出一個，即現時喺九龍區只有兩個物業。半年內放售手頭兩個單位，唔通佢預見樓市到頂，見好就收，漸進式減持套現？諗唔到Starry都係炒樓一族，但佢話賣樓基於「私人理由」，不便透露喎。

本身係會計師嘅Starry話，過往常為上市公司核數，買股票有好多限制，但又想投資，於是揀買磚頭。問佢點睇後市，佢話「置安心」計劃推出後個市不跌反升，加上低息同銀行水浸，如無重大突發因素，個市短期仍屬升勢。咦，Starry睇好後市，但又賣樓，係咪有啲矛盾呢？

另外，公民黨梁家傑本來有十二間用嚟持有物業嘅公司，本月十三日亦更新個人申報，多咗一間同類型公司，即係持有物業達十三項之多，佢話除自住用途嗰間之外，全部物業位於外地。立法會議員原來好多都好有米！