中環出更：立會午宴焦點人物「隱形」

立法會大樓頂樓尋日中午燈火通明，人聲鼎沸，事關立法會請客，招待政府高官及行會成員。飯前，議員高官自由交流，匯賢智庫主席葉劉淑儀、民主黨副主席劉慧卿同發展局局長林鄭月娥等女高官議員，個個悉心裝扮，猶如花蝴蝶滿場飛，反而幾位平日建制派宴會嘅常客發叔、CY同譚Sir，全場唔見影。發叔礙於「漏報事件」餘波未了，唔現身可以理解；CY唔知係咪唔想同特首疑似對手唐唐同台演出、以免場面尷尬呢？至於譚Sir，曾德成前日喺十八區正、副主席面前批評佢妨礙政府「申亞」，可能譚Sir又係唔想同「德成局長」一齊現身，以免被記者問到口啞，索性自動隱形。

唐唐暴走中環行錯路

尋日午宴，氣氛有啲怪，被捲入是非嘅人唔現身，現身嘅一心諗住散席後點散水。好似德成局長離開時被記者團團圍住，想問佢有冇計劃如何說服民建聯回心轉意改撐政府「申亞」，但佢堅持封口唔講。有記者講笑話唔畀佢走，一心求去嘅德成局長反問：「你點唔畀我走呢？」跟住就走咗去。唐唐更加被記者追到落立法會大樓外，對有指關愛基金成為佢競選特首基金，佢邊走邊拋低「荒謬」兩個字，走夾唔抖。心急想賣甩記者嘅佢，更一度暴走中環行錯路，座駕泊喺香港會對開馬路，佢卻向相反方向嘅皇后像廣場方向前去，經人提醒先知行返轉頭，頗為狼狽，卓妮見到都覺得好笑。

梁振英（右）同劉皇發同樣係是非人物，尋日都雙雙缺席。（資料圖片）	立法會尋日同政府高官及行會成員午宴，不過唔少惹火人物都無現身。 （伍鎮業攝）	心情勁靚嘅劉慧卿（左）滿場飛，同唔少政府高官言談甚歡。
穿上皮褸頂住鮎魚嘅葉劉淑儀，被人質疑件皮褸真定假。	林鄭月娥（左）現身立法會午宴，同立法會法律顧問馬耀添雞啄唔斷。

卓妮