執番條命 無力救人難釋懷

【本報訊】兩名大難不死的士司機黃家富及羅耀明,在意外發生後猶有餘悸,一面驚惶,頻呼好驚及好彩。赤腳逃出的士的富哥,表示要還神,而明哥在慶幸自己安然無恙之餘,因曾經與被困的旅遊巴司機四目交投,以為他瀕臨死亡,又無力拯救,心裏感到不安。兩人因經歷「死過翻生」意外,坦言將會有一段時間「瞓唔着」。

冇着鞋就爬出車

富哥受訪時憶述:「當時現場有二百部的士,我挨低司機位,除咗對鞋,瞓覺休息,停咗三個字,突然間聽到巴啦巴啦嘅撞擊聲,即刻扎醒。」然後「一望左邊就見有嘢壓咗落嚟我架車嘞,嘩!當時驚到我都唔知點,拿拿聲嘗試開唔開到門走,好彩司機位道門冇壓住,開得到,我拿拿聲爬出嚟。」他坦言:「當時連鞋都冇着,乜嘢都冇拎……驚呀,當時好驚,啱啱右邊司機位冇事,好彩好彩,要還神嘞,好彩,真係死過翻生。」事後他即時向家人報平安。

至於作為的士車主的明哥,意外發生時聽到砰一聲:「見到泵巴類似啲黑色嘢飛落嚟,跟住嗰架旅遊巴就喺你前面嘞,我就第一時間落咗車!」當時旅遊巴壓着他的士的車頭,而旅遊巴車頭正對着的士車頭,羅目睹旅遊巴司機被困情況。他嘆謂:「咁個司機就伏咗喺軚盤度囉……大家望住大家㗎……佢有反應,但係冇嗌,佢仲有呼吸。」

明哥無奈地說:「咁我仲唔走呀,我可以點做,我冇嘢可以做。冇得救㗎!你點樣擒上去呀?」對於有心無力拯救,他的心裏非常不安。不過,當他由警方獲知旅巴司機未死,頓然釋懷,但他坦言:「我愈諗單嘢愈驚,我都唔識同你講,今次意外總算自己安全,好好彩。」另外,受意外波及的姓鄭司機表示,事發時剛離開往吃飯,回來時見發生嚴重意外,嚇了一跳。

Money18新功能「18好路數」為你預測心水股票升跌機會率