政情：傳亞運火炬KK唔夠喉
廣州亞運會下個月舉行，亞運火炬前日傳到深圳，就連工聯會立法會議員KK黃國健都有份跑。到底亞運同KK有咩關係呢？KK話因為工聯會喺內地深圳、廣州同東莞三個地方都有設立諮詢服務中心，所以當局就預留咗三個跑手名額畀佢哋，分別由佢、理事長吳秋北同副理事長李麗貞參加。
訂造木架存放火炬
KK前日負責跑第四十一棒，為確保「接棒」萬無一失，佢仲特登早咗一日上深圳「上堂」，原來做跑手都好大學問，尤其係點火嗰刻，一個唔小心可能會燒着頭髮，跑嘅時候仲要「就鏡頭」，不時要望住宣傳車等睇直播嘅市民見到跑手正面，加上支火炬成一公斤重，要舉住跑一百米都唔係容易。
不過KK話佢一向有做運動，所以冇乜難度，仲講笑話未熱完身就已經跑完一百米，好似唔係好夠喉咁添！
KK已經拎咗支火炬返香港，依家放咗喺屋企，KK話要去訂造一個木架，將火炬拎返工聯會辦公室好好存放。