威院急症室外人車爭路

威院急症室正座對出為車輛出入口，旁更設有巴士及小巴總站，但插桅杆街至巴士及小巴站一段卻只有一組行人輔助線，人車爭路場面不斷出現。不時路經上址的楊先生以「險過剃頭」形容，「嗰度咩嘢車都有，有時啲小巴仲會踩行油咁掟彎，一條斑馬線都冇，叫啲行人點過馬路呀？」謝直言曾目睹不少長者及病人橫過馬路時均「明明踏咗出馬路都行番轉頭」，名副其實的一步一驚心。

推搪車流少拒改善

運輸署發言人承認，由○五年至今，上址曾發生四宗交通意外，由於肇事原因多為行人不小心過馬路，已設置三組行人輔助線方便行人過馬路。至於增設斑馬線的建議，該署經考慮後，認為上址車輛流量較低故毋須設置。

「嗰啲唔係行人輔助線，只係盲人輔助線，連基本過路設施都唔肯做，簡直離晒譜！」沙田區議會交通及運輸委員會副主席姚嘉俊直指運輸署漠視行人安全，對於多年來增加過路配套設施充耳不聞。姚更稱，上址其中一組「行人輔助線」的「望左」標記遭水泥遮蓋多時，令輔助功能盡失。鑑於威院新大樓已落成並陸續投入服務，插桅杆街人流亦會相應增加，擔心人車爭路情況或會引發意外，促運輸署重新審視情況，研究加設過路設施如斑馬線等可行性。

姚嘉俊（右）指運輸署所指的行人輔助線實為盲人輔助線，並未設「望左」和「望右」標記。

插桅杆街至威院急症室正門一帶常有不同車輛駛入，與運輸署所言「汽車流量低」不盡相同。

議員狠批逃避現實

立法會民政事務委員會委員陳淑莊狠批運輸署「死唔認錯」，明知醫院附近欠缺過路設施仍不肯面對現實，令人不能接受，「公立醫院出入口汽車流量低？有冇搞錯呀！」陳直斥運輸署未能以民為本，並無考慮市民需要，尤其出入醫院需要特別照顧病人所需，「斑馬線係醫院出入口嘅基本措施，冇咪整番囉，唔好淨係死撐！」陳更指運輸署須派員實地視察，而非侃侃而談卻不坐言起行。

市民心聲 譚婆婆：「呢度好多車架，無端端就有架車衝過嚟，真係好危險！」

韋先生：「一早就應該加斑馬線同紅綠燈啦，行人點都安全啲！」

記者：林綺淇