政情:潘佩璆做爺爺深刻

早前我哋預告過,工聯會勞工界立法會議員潘佩璆嘅大新抱有喜,上月十五日,BB終於呱呱落地,潘醫生嘅男孫出生時重六磅六安士,潘佩璆正式「升呢」做爺爺,恭喜!恭喜!

本身係觀塘聯合醫院精神科顧問醫生嘅潘佩璆,尋日提起第一次抱孫,喜形於色,成個人精神晒,話開心過當年自己第一次做老竇:「年輕時糊裏糊塗就做咗老竇,都唔知發生乜嘢事,今次做阿爺,深刻好多!」潘佩璆話,人到咗佢呢個年紀,見到家庭有小生命誕生,心裏自然生出一份生命延續嘅喜悅同幸福感,係金錢同名譽等其他事物都無法代替嘅。所以,佢奉勸各位已婚但無打算生BB嘅年輕人再諗一諗,希望大家到鬢髮霜白嘅時候,都可以享受佢依家呢份喜悅。佢仲話,打算喺下月下旬擺幾圍,請親朋戚友嚟開心一番,既慶祝抱孫,亦慶祝結婚卅周年。

Money18新功能「18好路數」為你預測心水股票升跌機會率