政情：潘佩璆做爺爺深刻

本身係觀塘聯合醫院精神科顧問醫生嘅潘佩璆，尋日提起第一次抱孫，喜形於色，成個人精神晒，話開心過當年自己第一次做老竇：「年輕時糊裏糊塗就做咗老竇，都唔知發生乜嘢事，今次做阿爺，深刻好多！」潘佩璆話，人到咗佢呢個年紀，見到家庭有小生命誕生，心裏自然生出一份生命延續嘅喜悅同幸福感，係金錢同名譽等其他事物都無法代替嘅。所以，佢奉勸各位已婚但無打算生ＢＢ嘅年輕人再諗一諗，希望大家到鬢髮霜白嘅時候，都可以享受佢依家呢份喜悅。佢仲話，打算喺下月下旬擺幾圍，請親朋戚友嚟開心一番，既慶祝抱孫，亦慶祝結婚卅周年。