政情：何志平話復修棚屋靠自己
國際非牟利組織「仁人家園」早前發起大澳棚屋復修計劃，協助當地三百幾間水上人家復修保育，以保留呢個已有二百幾年歷史嘅水鄉。尋日佢哋喺九龍灣舉行籌款活動，前民政事務局局長何志平以仁人家園災後重建榮譽顧問嘅身份出席。
自稱退休後遊戲人間嘅何志平話，當地棚屋嘅業權好複雜，因為啲屋仔起喺水上而唔係地上，多數無業權，有啲係舊時啲人霸咗間屋嚟住，政府好難插手。
政府難以插手
此外，部分棚屋興建時就有問題，譬如有人返屋企時要穿過鄰居間屋，如果兩家人不和就大件事。仲有當地水位唔平衡，衞生設備好難搞。所以當時政府決定唔插手，認為由民間力量去進行保育最好啦！
大澳有四百幾間棚屋，仁人家園揀選約三百間符合資格進行復修，現時已修畢廿幾間。以建築工程起家嘅俊和集團，已應承支持第二階段復修計劃，除咗捐錢仲會派義工團隊去幫手。俊和主席彭一庭話，佢已經報咗名參加義工隊，希望年底可以抽到身去幫公公婆婆復修棚屋。