政情：雙英格鬥范太顯地位
疑似特首候選人嘅一切舉動，永遠引人注目同遐想！正當官場「雙英」唐英年同梁振英（CY），尋日各師各法圖為二○一二年落場跑馬仔儲備民意彈藥之際，另一位被視為特首熱門人選嘅全國人大常委范徐麗泰，亦傳來惹人注目嘅消息。消息流傳，過去兩日，范太喺北京曾與新鮮出爐港澳辦主任王光亞見面，極可能成為王光亞上星期五正式接掌港澳辦後，第一個接見嘅香港人，盡顯江湖地位。唔知范太同王光亞碰頭，有冇傾到香港最新政局呢？
CY部署一二年落場跑馬仔，已經係政壇公開秘密，尋日佢喺預先張揚下，落深水埗探訪籠屋同板間房居民。臨場自爆早前扭傷膝頭十字韌帶嘅CY，身水身汗撐八層樓梯上籠屋，教清貧學生睇英文電視台學英文。CY喺施政報告發表前夕上演體恤民情政治騷，睇嚟都似係想催谷民望。
呢邊CY落區博曝光，一直未就治港理念開腔嘅唐唐尋日第一次講佢嘅諗法，唐唐喺政府新聞網嘅專訪中話，面對未來挑戰，政府角色要變，要懂平衡利益，又話社會應該思考點樣結合商界嘅錢去扶貧，呢番扶貧偉論，同CY嘅籠屋騷簡直相映成趣。新聞處唔知有心定無意，揀正尋日喺政府新聞網播放唐唐嘅專訪，變相幫咗唐唐抗衡CY。兩位疑似特首候選人為選前造勢隔空大鬥法，認真熱鬧！
王光亞率先晤范太
兩位疑似特首候選人鬥生鬥死，對香港特首人選有影響力嘅港澳辦主任換人，多少會影響佢哋嘅原有盤算。中央上周五晚宣布，任命原外交部副部長王光亞出任港澳辦主任，至今不過事隔兩日，不過消息流傳，王光亞已經開始進入角色，同香港政界接觸，而率先成為王光亞座上客嘅，並非別人，就係具備競逐特首寶座實力嘅前立法會主席范太。王光亞剛接掌港澳辦，必然要處理唔少換班交接工作安排，以及盡快掌握未來工作方針重點，佢坐上位置才一、兩日，即與范太碰頭會面，范太嘅江湖地位，由此可見一斑。
民望一直高企嘅范太，過往不斷被傳係特首熱門人選，而佢自己亦公開否認過無數次，明顯同CY、唐唐驚死人唔知自己有意落場跑馬仔嘅姿態截然不同。