中環耳目：鄧梅芬盛讚改良芝士雞批
以中藥產品起家嘅百年老店位元堂，十年前被現任主席鄧清河收購之後，喺中港兩地嘅發展神速，由初時三間分店擴充至依家超過一百五十幾間。具會計及核數專業知識嘅位元堂藥業控股執行董事、鄧主席胞妹鄧梅芬（Karen），幫哥哥出咗唔少心力。日前卓妮見佢同公司總經理黃淑芳喺中環聘珍樓食午飯，兩人一邊歎創意點心一邊傾公務，好識善用寶貴時間。
當日Karen特登嚟幫襯同為優質旅遊服務協會會員嘅聘珍樓，認真有心！佢點咗幾款特色點心，包括芝士雞批、龍王金魚餃，再叫煲老火湯同埋炒青菜，食得簡單又開心。佢極力推介餐廳嘅驚喜之作芝士雞批，咪以為雞批好飽滯，其實改良後嘅芝士雞批約蛋撻仔咁大，皮薄脆香而不膩，熱辣辣上碟後即刻享用，好好味。
講番位元堂嘅發展，原來佢哋唔止賣中藥咁簡單，連西藥都有㗎！耳熟能詳嘅珮夫人就係佢哋旗下業務，近年以「珮氏」推出嘅個人護理產品，例如驅蚊爽系列都好受歡迎架！