警濫用白車累救護內訌
天水圍一宗企圖盜竊案的兩名疑匪被帶返警署後，因傷需送院，警方通知消防處派一輛救護車到場後，突然又要求多一輛將兩人分開送院，被質疑有濫用救護車之嫌。警方臨時改變主意，引起消防處的救護車安排出問題，累救護車主管與消防處控制中心職員隔空怨氣答問，險釀罵戰。
爆竊案發生在昨晨一時許，兩雙程證男子潛入屏廈路一回收場企圖盜竊，負責人透過閉路電視揭發，警員趕至將兩名姓黃（四十五歲）及姓萬（三十四歲）男子拘捕，兩人雙腳扭傷，但在現場拒絕送院，被帶返天水圍警署扣查。鑑於他們的傷勢，警方認為有需要將他們送院治理，於是在凌晨三時許召救護車。
據悉，警方當時只召一輛救護車到場，該救護車準備將兩疑犯送院時，警員突然要求將兩人分開送院，救護車主管曾向警方解釋「一架車可以做晒」，並指要兩輛救護車有濫用之嫌。
對話火藥味濃
不過，現場警員稱，「人手同案情問題」要將兩疑犯分開送院。救護車主管遂向消防處控制中心報告，控制中心一名女職員質疑「咁做乜事要兩架呢?」她要致電天水圍警署查問，警方又稱可以一輛救護車載兩疑犯，控制中心女職員遂向救護車主管轉達，但救護車主管表示：「我應咗佢一架搞掂，依家佢變卦嘞，我已經離開咗場嘞！」雙方對話的火藥味濃烈。
惟救護車已接載一名疑犯前往醫院，控制中心女職員無奈通知另一輛救護車到警署接載另一名疑犯。據消息透露，該名救護車主管事後向直屬上司投訴警方濫用救護車。
消防處發言人稱，初時接獲警方要求派出一輛救護車，其後警方要求增派一輛，救護車主管向上峰要求支援。警方發言人則表示，警方在可行情況下會盡量把案件的共犯分隔，以免他們「夾口供」，因此需召兩車分別把兩人送院。警方有既定程序指示人員安排犯人送院，但案件主管可因應實際情況召喚救護車。
救護車主管與控制中心對話節錄
救護車主管：麻煩你派多架救護車嚟天水圍警署吖，依家警察要求係兩架救護車，我解釋咗畀佢聽，一架車可以做晒，加上佢咁樣係濫用，我亦都解釋咗畀佢聽。
控制中心：咁做乜事要兩架呢？
救護車主管：因為人手分配嘅問題喎！
控制中心：我打畀佢同佢……
救護車主管：師姐唔使打啦，佢話人手同案情嘅問題呀，要控制場面。
控制中心：393天水圍警署嗰度話你一架可以搞掂喎！
救護車主管：我頭先，我應承咗佢一架搞掂，依家佢變卦嘞，我已經離咗場嘞！
控制中心：吓！我剛剛畀電話佢喎，佢話同你傾好咗，可以上多個喎！
救護車主管：我依家離場，未有人同我話可以上多個，依家我哋現場已經有警察跟車嘞，亦都冇聽到佢依家有人要求，我已經離開警署。
控制中心：救護車主管，送院後電話聯絡指揮室。
救護車主管：收到啦！我都會聯絡㗎啦！