中環出更：林澄光鍾情老爺車
近年人氣急升嘅「少年食神」林澄光（Michael）嗜好多，除咗鍾意捐窿捐罅搜羅美食，仲係老爺車迷，尋日中環舉行老爺車展，Michael都去湊熱鬧，仲帶埋相機左拍右拍，鬼咁認真，莫非佢想由食神轉型做車神？
逾百架名牌老爺車尋日齊集中環遮打道，吸引車迷蜂擁而至。人群中，卓妮發現Michael嘅身影，原來佢係老爺車發燒友，家中珍藏唔少舊車，車展會場展出多部保時捷、法拉利及勞斯萊斯等名車，Michael興奮地舉機逐一留念，對於難得一見嘅車款，更細心地鑽研一番。
到底老爺車有乜吸引力？Michael話，鍾意老爺車係一種情意結，擁有以前細個喺街上見到嘅名車，好有滿足感。
Michael呢顆好奇心，令佢事事鑽研。近年火速冒升為食評家，又出書又喺電台講飲講食，「伯樂」原來係節目主持人森美、小儀，Michael回憶被發掘經過話，有次相約朋友食飯，森美都係座上客之一，席間Michael大談飲紅酒心得，令森美聽得津津有味。
畀森美發掘做「食神」
聚會尾聲，森美嗌肚餓想食消夜，Michael就提議去土瓜灣近浙江街嘅麥當勞品嘗即叫即整嘅豬柳蛋漢堡，對方心諗，食快餐點會有驚喜，估唔到森美試食後豎起拇指讚好，話呢度嘅蛋特別香，熱辣辣焗出嚟嘅鬆餅上，無數窿仔一伸一縮好似識笑一樣。驚嘆Michael有「搵食」眼光，馬上邀請佢上電台講食經。
為追尋美食，Michael無處不在，日前現身一個推介澳洲美酒嘅Wine Dinner，巧遇馬會大董葉澍堃細仔葉瀚華，兩人惺惺相惜，齊齊交流品酒心得，瀚華近日學爸爸一樣，進軍食評家行列，喺報章寫食經，兩仔爺鬥嘴刁。
卓妮