政情：李本瀅迷蕭邦夜曲
音樂不嬲都有種魔力，將人與人連結起嚟。天文台台長李本瀅深明此道，日前就喺台長網誌上拋磚引玉，公開介紹佢最喜歡聽嘅蕭邦夜曲，睇吓搵唔搵到志同道合嘅朋友之餘，亦鼓勵大家多啲接觸古典音樂！
今年係蕭邦誕生二百周年紀念，李本瀅喺網誌自爆話，佢第一次接觸蕭邦嘅音樂，係細細個父母帶佢去戲院睇《紅樓琴斷》嘅時候。該片嘅主題曲正正係蕭邦二十幾首夜曲中最出名嘅降E大調夜曲，李本瀅話呢首夜曲聽咗咁多年，至今聽來依然動人心弦。不過佢就暗嘲自己老餅，笑言好多人都應該冇睇過呢套戲喎。
李本瀅話佢鍾意聽蕭邦，全因佢比其他浪漫時代夜曲嘅作曲家較別具一格，夜曲唔單止有「夜」嘅情緒，更超越大自然嘅夜景，令聽者聯想起夜鶯婉轉、狂風暴雨過後嘅惆悵同對未來嘅遐思。
李本瀅仲推薦咗幾位著名演奏家，好似巴倫邦同波連尼等彈奏嘅蕭邦作品，但就事先聲明自己聽樂欣賞嘅經驗仲淺，佢嘅「推介」有可能因個人喜惡而有所偏頗喎，相當謙虛。