政情：鄺志堅Hea做政治顧問
政改敲定後，香港進入選舉戰國時代。政黨政團忙於爭位，專責抬轎嘅競選經理都成為熱門行業，工聯會大狀鄺志堅都決定離開任職多年嘅工聯會，自立門戶做政治顧問，專攻送建制參選人入議會嘅生意，擺明車馬同民建聯出身嘅程介南爭飯食。
做埋今日就離開工聯會嘅鄺志堅，雖然未搵寫字樓，但已印定臨時卡片，打出「鄺志堅顧問公司」名堂招攬生意，據聞已有準備競選區議員嘅潛在客戶搵佢。鄺志堅早喺九五年工聯會現任會長鄭耀棠入立法局時，已幫手做議會工作，跟住又做過立法會議員，經驗唔少，佢Hardsell話：「依家有啲人做政治分析、議員培訓，『噏兩噏』就收幾萬蚊，佢講不如我講。」
鄺志堅今次自立門戶，亦因為屋企無乜經濟壓力，事關喺科大讀完工商管理嘅大仔入咗大型外資銀行，家吓已經收緊家用；細仔喺中大讀書，做緊公務員嘅老婆明年又退休，所以係時候做啲Hea嘅工作，出去闖蕩吓。