政情：黃家和踢爆高官腰圍
署理食物及衞生局局長梁卓偉尋日出席衞生署嘅「健康有計 適飲適食齊起動」活動，推廣全民健康飲食同運動，預防心臟病、糖尿病等非傳染病，同場仲有食環署署長卓永興、康文署署長馮程淑儀、衞生署署長等高官出席。
活動其中一個環節，邀請咗餐飲聯業協會會長黃家和同大家分享健康飲食心得。黃家和話，以前啲飲食業界以為「多鹽、多糖、多油」煮嘅食物至好味，但呢個想法已經「過期」，仲話識得「三少」咁健康嘅食客先識食。
點知佢講得興起，居然喺台上論盡在場高官嘅腰圍：「以我經驗，就咁睇，Gabriel（梁卓偉）同馮程淑儀條腰應該得廿八、廿九吋，幾slim（苗條）！不過卓永興、我估佢都有三十八吋腰喎。哈！哈！哈！」話音一落，全場爆笑，卓永興亦只好報以尷尬嘅微笑。