政情：劉夢熊就快抱外孫
全國政協委員劉夢熊嘅千金劉楚思去年十一月底結婚，話咁快已經有喜。上周我哋喺全國華僑華人促進中國和平統一大會活動上見到劉夢熊，佢心情靚絕，原來囡囡已經有咗幾個月身孕，呢位未來外公好開心咁話：「應該趕得切
我封利是！」
記得去年劉夢熊嫁女，喺君悅酒店筵開多圍，政商界人士都畀面到賀，場面好溫馨熱鬧。雖然劉夢熊同太太冇特別催促一對新人，但女婿同囡囡都好識做，明年過年屋企多咗個BB，兩老肯定開心好多啦！
當日中華總商會榮譽會長霍震寰都喺現場，佢係和統會香港總會監事長，劉夢熊一見到佢就好熟落咁話，兩人相識三十幾年嘞！霍震寰聞言趕忙糾正佢，話唔好講得咁詳細，講個尾數得啦。
一向敢言嘅劉夢熊當日對中國船長詹其雄被日本扣留事件好火滾，狂數日本仔唔啱，又話釣魚島以前係台灣宜蘭縣轄下地方；好彩依家船長已安抵家中，睇怕佢唔使咁勞氣嘞啩！